Den e siman aki, e barku di marina stashoná den Karibe, Zr.Ms.Holland, a interseptá un lote di droga venezolano. E barku di marina, tabata bai riba velosidat haltu den direkshon Isla Riba, ora a tuma nota di un boto piskadó riba radar. Na momentu ku a detektá e boto piskadó, esaki a kuminsá hasi maniobranan sospechoso. Según e relato di Defensa na e momentu ku e barku di marina a nabegá ku tur velosidat den direkshon di e boto di piskadó, nan a manda un boto interseptor, FRISC (Fast Raiding Interception Special Forces Craft). E tripulantenan di e boto piskadó a paga nan motor i a hasi komo si fuera nan tin problema tékniko. For di e barku, Holland, por a mira kon nan tabata benta paketenan for di e boto piskadó. A logra trese e paketenan na bordo di e barku di marina. A resultá ku e paketenan tabata kontené un total di 64.5 kilo di kokaina, ku tin un balor di 3.5 mion euro riba merkado. A entregá e droga interseptá na e Wardakosta di Isla Riba. E barku di marina Holland, na e momentunan aki ta hasi trabounan pa Wardakosta Teritorio di Karibe. Banda di operashonan kontra droga, nan tin tambe komo tarea, konservashon i servisionan marítimo.