Den luna di novèmber e kantidat di nor-koreanonan ku ta huí bai Sur-Korea a oumentá i alkansá e kantidat di 30.000. E kantidat di hende ku ta krusa frontera a oumentá ku 21% kompará ku aña pasá. Gobièrnu di Seoul a tuma medidanan pa yuda e hende nobo integrá, asina e agensia di prensa di Sur Korea Yonhapo a deklará. Ministerio di Reunifikashon di Sur Korea, a anunsiá ku na fin di òktober ku a pasa, 29.948 persona ku ántes tabata na nort korea, awor nan ta biba den e parti sur. Un funshonario a bisa ku e kantidat lo alkansá 30.000 refugiado pa medio di novèmber. E aña aki so 1.154 norkoreano a logra huí for di e régimen den nan pais. Na 2011, 2.706 norkoreano a krusa frontera bai den e parti sur. E kantidat a baha despues na 1.502. Den 2013 e kantidat a keda masomenos igual, 1.514 i a sigui baha den e dos añanan siguiente na 1.397 i 1.276. Seoul lo tin idea pa lansa un proyekto di integrashon nobo. Lo duna e refugiadonan mas sosten, por ehèmpel ora nan ta buska trabou. Segun Yonhap mas i mas norkoreano ta huí for di nan pais, debí na e diktadura di Kim Jong-un. E kontraversial lider ta usa métodonan ekstremo manera ehekushon den públiko, pa tene su pais bou di su dominio.