
Ku 279 voto elektoral, e republikano Donald Trump, a bira awor e di 45 presidente di Merka.
Raúl Castro, Presidente di Cuba a felisitá presidente elekto di Merka, Donald Trump, asina Ministerio de Eksterior di Cuba a bisa. Josefina Vidal ku ta direktor general na Merka pa e Ministerio di Relashonnan Eksterior di Cuba (MINREX), a konfirmá esaki via su kuenta di Twitter. Vários mandatario for di rònt mundu a felisitá Donald Trump komo presidente elekto di Merka. Durante su kampaña presidensial, e republikano a atvertí ku na momentu ku e bira presidente di Merka, e lo kambia algun aspekto relashoná ku polítika eksterior di Merka. Dia 17 di sèptèmber, Donald Trump a menasá di kibra relashonnan diplomátiko ku Cuba, a ménos ku gobièrnu di e isla, adoptá “nos demandanan”.
Den un akto di kampaña, na Miami, Donald Trump a sigurá ku un gobièrnu repúblikano, por revoká e reapertura den relashonnan entre e dos paisnan. Trump a referí aki na e resiente akuerdo ku Presidente Barack Obama i Raúl Castro di Cuba, a yega na dje.