MAN, PAR, PNP i PS ta bai forma gobièrnu.


Despues di a reuní hinter djarason na Santa Barbara Resort, e partidonan MAN, PAR, PNP i PS a yega na un akuerdo di forma e gobièrnu nobo pa pais Kòrsou. Formadó Kenneth Gijsbertha a konfirmá esaki na medionan di komunikashon. Despues ku djamars atardi a surgi konfushon, na momentu ku Dean Rozier a bishitá Jaime Cordoba na su ofisina den Parlamento, partidonan a bai bèk den nan seno. Durante e reunion entre partidonan a palabrá e siguiente repartishon di asiento : MAN ta haña e kartera di Asuntunan General, Promé Minister, Minister Plenipotensiario, Minister di Finansas, Minister di Enseñansa, Deporte i Kultura i Presidente di Parlamento. PAR ta haña Minister di Ekonomia i Minister di Salubridat. Vice Promé Minister i Vice Presidente di Parlamento. PNP ta haña Minister di Tráfiko i Planifikashon Úrbano i tambe Minister di Hustisia. PS ta haña Minister di Asuntunan Sosial, Labor i Bienestar i tambe Minister enkargá ku Maneho di Gobernashon, Planifikashon i Sèrvisio Públiko. Manera palabrá, djaweps formadó lo raportá serka gobernadó, mientras ku den e dianan ku ta sigui e partidonan lo sigui traha riba e akuerdo i plan di gobernashon.