Pa 12or di anochi ta kuminsá spera promé resultadonan den elekshon na Merka.

Awe merikanonan ta skohe entre Hillary Clinton i Donald Trump den un elekshon históriko. For di 6or di mainta ora lokal, estadonan na kosta ost di Merka a kuminsá vota. Clinton a depositá su voto kaminda e ta residensia na Chappaqua den e estado di New York. Su kasá Bill Clinton tambe a vota einan. Trump a vota mas lat den dia na Midtown na New York, kompañá di su kasa i yu muhé. Votadónan den diferente estado a topa filanan largu na urnanan, loke por nifiká ku un kantidat grandi di hende ta vota den elekshon di awe. Ya kaba un kantidat rèkert di 46.3 mion persona a depositá nan voto. Na algun lokalidat pa vota tabatin fayo ku e ekiponan di votashon loke a kousa sierto tardansa. Pa masomenos 12or di anochi ta spera e promé resultadonan, na momentu ku e lokalidatnan di votashon na kosta west sera. Algun enkuesta ta indiká kaba ku Clinton tin un bentaha di kuater punto riba su kontrinkante repúblikano Donald Trump.