E promé resultado ofisial di elekshon na Estados Unidos a tuma lugá na Dixville Notch (New Hampshire). Einan ta biba nèt 8 persona ku derecho di voto. Hillary Clinton a gana ku kuater voto. Dos persona a vota pa Trump. E otro votonan a bai pa independiente Gary Johnson i pa Mitt Romney, ku ni sikiera ta partisipá na elekshon. Na Merka ta posibel pa vota pa un hende ku ofisialmente no ta reelegibel. Na 2012, e mionario republikano, Mitt Romney a kampañá kontra Obama. Na Dixville e urna elektoral ta habri masoménos mei anochi riba 8 di novèmber. Ora tur e ocho votonan tabata aden, a sera e urna i a konta e votonan. Un kantidat rèkert di merikano a bai vota for di tempran pa e elekshon presidensial na Merka. E agensia di prensa Associated Press basá riba nan propio investigashon, a raportá ku fo’i temparn, probablemente ta banda di 50 mion. Esaki ta kasi 40 porshento di e kantidat total di votadónan. Kuater aña pasá tabatin kasi 46 mion persona ku a vota tempran. Na Merka ta masha usual pa vota den e simannan promé ku e fecha real di elekshon. A introdusí e sistema pa subi e asistensia. Riba e dia di elekshon ta konta e votonan emití. E asistensia den votashon tempran ta ser mirá komo bon notisia pa e kandidato demókrata Clinton. Spesialmente e latinonan, ku normalmente ta vota p’e partido demókrata, a bai vota tempran.
Donald Trump tabata den kampaña te na último momentu den vários estado. Di otro banda Clinton a tene un manifestashon grandi na Philadelphia (Pennsylvania), kaminda entre otro presidente Obama, Bruce Springsteen i Jon Bon Jovi a ekspresá nan sosten na e kandidato.
Riba e último dia di kampaña na Manchester, New Hampshire Trump a bisa: “Boso ke pa Merka keda goberná pa polítikonan korupto òf boso ke pa Merka keda goberná pa e pueblo.”
Den e último sondeonan di e agensia di prensa Reuters i e agensia di sondeo Ipsos States of the Nation tabata mustra ku Clinton tin 90% di chèns pa gana.