MAN aserká Marilyn Moses pa purba yega na gobièrnu ku sosten di mayoria.


Ketu bai MAN ta purba forma gobièrnu, no opstante ku miembro di parlamento pa PAR Eduard Braam a entrega su retiro ayera. Esaki ta loke fuentenan yegá na e negosiashonnan a informá. A aserká tambe Partido Movementu Progresivo di Marilyn Moses, pa asina yega na un mayoria huntu ku e partidonan MAN, PAR, PNP i UKH ku aktualmente ta konta ainda ku 10 parlamentario. Anteriormente Moses a deklará di ta dispuesto di forma parti di koalishon, pero ta awor numa ku Eduard Braam di PAR a retirá a kuminsá ku kombersashon ku su partido. Según fuentenan lo a ofresé Moses e kartera di Minister di Salubridat, Medioambiente i Naturalesa, pero Moses mes no a konfirmá ni desmentí esaki. Formadó Kenneth Gijsbertha tin te ku djaweps 10 di novèmber pa duna relato na gobernador Lucille George- Wout. Si pa djaweps awor i no logra forma un koalishon, ku un mayoria di por lo ménos 11 parlamentario, ta probabel ku MFK, ku a resultá e di dos partido mas grandi, lo risibí e tarea pa forma un gobièrnu nobo.