E último enkuesta grandi di Agensia di Prensa Reuters i Ipsos States of the Nation, riba resultado di elekshon presidensial na Merka, ta duna Hillary Clinton 90% chèns di gana. E pronostiko ta masomenos igual na un siman pasá. Clinton lo haña segun Reuters/Ipsos States of the Nation, 45 % di e votonan, kontra 42% di Trump. E èks minister di Asuntunan Eksterior, ta pará na 303 delegado i Trump riba 235. Pa gana e kontienda pa Kas Blanku, e kandidatonan mester logra di 270 delegado.
Nòrt Carolina, ta un di e promé estadonan ku djamars anochi lo kuminsá duna resultado. Esaki lo duna un indikashon dirèkt kon e lucha lo ta e estado aki. Si Clinton gana e estado aki, esei lo nifiká ku e poblashon pretu, a sali pa voto na kantidatnan igual ku 2012. E tempu ei, e aktual presidente, Barack Obama a derotá su oponente republikano Mitt Romney. E estado ta esensial pa Trump, si realmente e ke tin chèns pa gana. Si Clinton gana ei nan, e orei ta ún estado di e asina yamá “swing states” so e lo mester gana adishonal. E “swing state-nan” ta Ohio, Michigan i Pennsylvania. Di otro banda si Trump ke tin un chèns, e mester gana nan tur tres. Si Trump logra gana na Florida, e or’ei probablemente e lo gana Ohio i Michigan tambe.
Segun enkuestanan, Clinton tin 1 punto den delantera na Florida. E bentaha di un punto prosènt na Florida ta un bentaha masha marginal. Sinembargo Clinton ta bon pará aki tambe, prinsipalmente serka e poblashon pretu i latino. No opstante esaki e mester haña tambe sosten di e poblashon pretu di Florida. Si esei no pasa, esaki lo krea un situashon di hopi suspenso.