A registrá diferente suseso durante elekshon na Merka.


Según New York Times, polítikonan i ekspertonan ta tene kuenta ku pa e elekshon aki por spera mas konfushon i problema ku elekshonnan den pasado. Tin sierto votadónan ku mester para oranan largu den rei pa por a vota. Na sierto siudat a surgi algun konfrontashon entre simpatisantenan di Donald Trump i Hillary Clinton. Opservadornan ta indiká ku por spera sierto grado di intimidashon, paso Trump a hasi un yamada na su simpatisantenan pa nan keda na e lokalnan di votashon pa mira si tin froude ku votashon ta tuma lugá. Na Broward County na Florida a retirá dos trahadó di un lokalidat di votashon pa motibu ku nan no a traha di forma íntegro. Na sierto lokalidat tabatin kasonan di konfrontashon fuerte entre e dos kamponan, pero nada ku a krea problema muchu grandi. Algun estado a tuma medida pa prevení sierto komportashon i konfrontashon. Na Pennsylvania, outoridatnan a atvertí for di tempran ku tin un pena di 10 aña di kastigu di prison si di un forma òf otro stroba otronan pa ehersé nan derechi di voto.