Despues ku Amparo a papia i mesora PAR a reakshoná. “Komo partido polítiko, nos ta respetá resultadonan di último elekshon. Partido ganadó tabata MAN i na nos opinion, nan ta responsabel pa e formashon di un gobièrnu nobo,” asina e líder di PAR, Zita Jesus-Leito a komentá. Jesus-Leito, su komentarionan ta reakshon riba líder di e partido Kòrsou di Nos Tur (KdNT). Según e lider i komersiante, Amparo dos Santos, PAR ta pone preshon riba e otro miembronan di koalishon, esta PNP i Pueblo Soberano (PS). Dos Santos a bisa, ku si e dos partidonan ei negoshá ku su partido, tur dos lo haña dos minister. Pa Jesus-Leito, negosiashonnan mester bai konforme reglanan. “No ta posibel pa e partido di Dos Santos, negoshá un gobièrnu via prensa. Pero mi sa ku Dos Santos ta desapuntá, pasó nos lo forma un gobièrnu sin nan i nos lo hasi un trabou ekselente,” asina e lider di PAR a konklui.