Koalishon ulandes a pèrdè mayoria den Tweede Kamer.


Miembro di Tweede Kamer pa PvdA Jacques Monasch a sali for di e frakshon i a renunsiá na su miembresia ku e partido. Monasch a partisipá su desishon djaluna. Den un reakshon Monasch ta bisa ku “esaki ta hasimi hopi tristu. For di mi 16 aña mi ta miembro di PvdA. Mi a traha den tur skina di pais pa e partido ei. Pero mi ta haña ku PvdA mester keda fiel i mustra mas rèspèt pa su mes. Nan ta bai un direkshon den kuá ami no por karga nan mas. Mi ta haña nos mester ta un partido habrií, spesialmente den temporada difísil”. E koalishon di VVD i PvdA tin awor 75 asiento i ku esei nan ta pèrdè mayoria den Tweede Kamer. E pèrdida di mayoria no mester ta un problema muchu grandi. Pa un tempu kaba e koalishon no tabatin mayoria den Eerste Kamer i den hopi kaso, koalishon a haña sosten di oposishon. Ademas aki seis luna tin elekshon na Ulanda. [if !supportLineBreakNewLine] [endif]