Braam (PAR) ta bai ku asiento, sin ku gobièrnun nobo a ni sinta ainda. (audio)


Djaluna mainta dòkter Eduard Braam a anunsiá ku e ta retirá komo presidente di PAR i posishoná su mes komo independiente. For di den fin di siman tabatin basta informashon relashoná ku formashon di gobièrnu. Dado momentu a surgi un buelta nobo den e proseso di formashon ora ku Pueblo Soberano a eksihí pa meskos ku PNP nan tambe haña dos minister. Informashonnan èkstraofisial ta indiká ku a opta pa duna Partido Nashonal di Pueblo dos minister pa akomodá i plankiá e tenshon den dos korientenan den PNP. Konsiderando ku meskos ku PNP nan tambe tin dos asiento, Pueblo Soberano a para ariba pa nan tambe haña dos minister.

Esaki no a ser aseptá i e bloke a hasi un apelashon riba Omayra Leeflang (Un Kòrsou Hustu) pa reforsá i mantené un mayoria di 11 asiento. Mesora e partidonan MAN, PAR, PNP i UKH a firma un akuerdo di disponibilidat pa forma e gobièrnu nobo. Sinembargo, e karta tabata falta firma di vários Parlamentario, entre nan Eduard Braam (PAR), ku porsierto ta presidente di e partido. Parlamentario Braam tabata den eksterior. Fuentenan ku por sa ta indiká ku for di den fin di siman PAR tabata buska kontakto telefoniko ku dòkter Braam na Colombia. Sinembargo e Parlamentario no a kue su telefòn. A manda tambe e karta di akuerdo entre partidonan PAR, MAN, PNP i UKH, pa e parlamentario firma den eksterior, pero esaki tampoko a tuma lugá. Djaluna mainta dòkter Braam a manda un karta pa gobernadó, pa indiká ku el a tuma su retiro for di PAR i ta posishoná su mes komo miembro independiente den Parlamento. Tin indikashon ku Braam no ta muchu kontentu ku e lider di PAR, Zita Jesus-Leito. Ademas e parlamentario lo no tabata muchu di akuerdo pa traha ku “of all people” èks miembro di PAR, Omayra Leeflang den un gobièrnu nobo. PAR tabata bastante rabiá ku Leeflang ku tambe a bandoná e partido ku su asiento, algun tempu pasá. Fuentenan ta indiká ku aparentemente, Zita Jesus-Leito lo a bai haña e kartera di salubridat, siendo ku ku no a konsultá ku dòkter Braam riba e nombramentu, ni desaroyonan rondó di formashon. Klek pa skucha Parlamentario Eduard Braam den su promé deklarashon na radio Direct 107.1 FM E buelta sorpresivo aki, ta surgi algun ora promé ku formadó Kenneth Gijsbertha reuní ku gobernadó riba formashon di gobièrnu nobo. Ku retiro di Braam for di PAR i su posishon komo independiente den Parlamento, ya e bloke MAN, PAR, PNP i UKH no tin un mayoria di 11 asiento. Esaki ta trese un buèlta intresante den e proseso, debí ku awor mester mira si e otro bloke (MFK, KdNT, PS i MP) lo por yega na mayoria di 11, ku sosten di Braam, pa forma un gobièrnu nobo pa Kòrsou. Klek pa skucha Parlamentario Zita Jesus-Leito den su promé deklarashon na Radio MAS 99.7 FM