Den un karta ku FBI a manda pa Kongreso merikano djadumingu, e servisio ta deklará ku nan no a konstatá nada partikular den e i-meilnan nobo ku nan a investigá relashoná ku e kandidato demókrata Hillary Clinton. Komo tal FBI no ta mira motibu tampoko pa pèrsigui Clinton. E servisio ta keda na su konklushonnan di yüli último, asina direktor di FBI, James Comey a indiká. Dia 28 di òktober pasá, FBI a bolbe laga hasi investigashon, despues ku a sali i-meilnan nobo den otro kaso ku por tabata relashoná ku Clinton. Partido demókrata a laga sa den un reakshon di ta kontentu. “Semper nos tatin konfiansa ku lo no a bin kambio den e desishon di yüli,” asina bosero di Clinton, Brian Fallon, a skibi riba Twitter. E karta di Comey, ta un desepshon pa e repúblikanonan, ku durante nan kampaña a pone hopi atenshon na e asuntu di i-meilnan. E kandidato repúblikano, Donald Trump, a bisa djadumingu ku Clinton ta ser protehá pa un sistema desonesto.
Den su periodo komo Minister di Asuntunan Eksterior (2009-2013), Clinton a usa un “server” privá, pa manda i-meilnan ofisial. Pa motibu ku “servernan” privá ta mas fásil pa “hackernan” por drenta, FBI no por a garantisá ku e informashon sensitivo lo por a kai den man di gobièrnunan den eksterior. Maske ku e kandidato presidensial demókrata inisialmente a ninga di a manda òf risibí informashon sekretu, FBI a bisa ku esaki sosodé tòg ku sigur 110 i-meil. No opstante di esei, e servisio a disidí ku no ta persiguí Hillary. Loke si FBI a bisa ta ku el a aktua ekstremadamente imprudente.
A bin topa e i-meilnan nobo riba kompiuter di Anthony Weiner, e èks esposo di Huma Abedin ku ta asistente di Clinton. Ta sospechá Weiner di vários skandal di sèks, entre otro di manda mensahenan di karakter seksual pa muchanan menor di edat. E hefe di FBI a haña hopi krítika riba su forma di proseder, ora el a anusiá resien ku ta habri e invistigashon riba Clinton di nobo. Diferente polítiko a akus’é di ta influenshá e elekshon. FBI pa hopi tempu kaba ta hiba e maneho, pa no tuma niun paso djis den porta di elekshon, si e esaki por tin influenshá resultado di e elekshon.