Den un akshon praktikamente unánime, Asamblea General di Nashonnan Uní a adoptá un resolushon pa enfatisá e nesesidat pa stop e bòikòt ekonómiko, komersial i finansiero di Merka kontra Cuba. A aploudí na mes momentu e progreso den e relashonnan entre e dos paisnan. Pero, pa promé bia den e 25 aña di votashon anual, Merka huntu ku Israel, na lugá di bai kontra di e teksto, a apstené na vota. E aña aki, 191 di e 193 miembro di Asamblea a vota na fabor di e teksto. E Asamblea a tuma nota di e akshonnan atministrativo di parti di Merka pa adaptá algun aspekto na implementashon di e bòikòt. Según e organo di Nashonnan Uní, e pasonan ta positivo, pero limitá den tamaño. Mas aleu e Asamblea a reiterá su yamada na tur miembro di Nashonnan Uní, pa nan apstené nan mes di promulgá i apliká leinan i medionan ku no ta konforme nan obligashonnan i ku ta kai bou di e kapítulo di leinan internashonal, ku ta konfirmá libertat di komersio i navigashon. Según e resolushon ta dikta, e Asamblea, un bia mas ta urgi estadonan ku tin i ta sigui apliká leinan asina pa tuma e pasonan nesesario pa revoká i invalidá esakinan mas pronto posibel.