Entrante promé di yanüari 2017, biuda i wérfano den eksterior lo haña ménos plaka.


Entrante promé di yanüari, 539 biuda i wérfano ku tin derechi riba AWW (Algemene Weduwen- en Wezenverzekering) ta bai risibí ménos plaka. Studiantenan den eksterior ku a pèrdè un òf tur dos mayor, lo haña respektivamente 408 i 468 florin ménos entrante 2017. Na yüni 2016, parlamento a aprobá un kambio di lei pa tur esnan ku ta biba den eksterior i tin derechi riba AWW i AOV. E lei ta nifiká ku biuda i wérfanonan lo risibí 10% ménos i e bonùs di pasku tambe ta kaduká. Segun gobièrnu, e medida ta nesesario pa por eliminá e défisit i asina salvaguardiá e fondo di penshun. E medida mester produsí un suma di 38 mion pa aña.

No ta konosí kuantu e medida lo produsí for di esnan ku tin derechi riba pago di AWW so. E kantidat di hende ku tin derechi riba AOV i ta biba den eksterior ta hopi mas ku e kantidat di esnan ku tin derechi riba AWW.

Segun SVB, no por lòs e AWW for di e AOV. E prima AOV/AWW ku e trahadó i e doño di trabou mester paga ta 16%. Di esaki 1% ta bai den e fondo di AWW.

Mayoría di e 539 personanan ku tin derechi riba AWW, ta haña un penshun di wérfano. Ta trata di 402 hóben i 137 biuda- i biudonan ku ta biba den eksterior.