Turismo di Karibe por yega un kantidat rèkert di 30 mion turista e aña aki. E sektor lo sigui krese pa di 6 aña siguí den region di Karibe, asina direktor di Caribbean Hotel and Tourism Association a bisa durante e konferensha Shared Ownerhip Investment Conference ku a tuma lugá na Miami. Di e 32 organisashonnan di turismo den Karibe, 21 a konfirmá ku nan tabatin kresementu te ku awor pa loke ta trata aña 2016. Ta antisipá ku e kresementu lo ta entre 4.5 i 6 porshento kompará ku aña pasa. Te ku awor Karibe a yama bon bini na sigur 29 mion turista ku a gasta un suma di aproksimadamente 30 bion dòler. Esaki ta un oumento grandi kompará ku aña pasa. A mira un oumento for di Canada i Gran Bretaña. Motibunan pa kresementu ta entre otro kresementu ekonómiko mundial, redukshon di preisnan di petroli, buelonan adishonal i énfasis dirigí riba merkadonan. Sinembargo e sektor ta konfrontando algun reto. No opstante e kresementu akí, na yüli di e aña aki a tabatin 2.7 porshento ménos di okupashon den hotèlnan tradishonal. Na Kòrsou mes, hotèlnan tin hopi kompetensia di bùngalo, apartamentu i fletnan. Otro faktor ku a stroba kresementu den e region di Karibe, ta e presensia di Zika ku a krea hopi publisidat negativo.