No ta permití pa konservá e shinishi di un hende ku fayesé den kas, tampoko ta pèrmití pa stroi nan shinishi den aire, riba tera òf den awa, asina Vatikano a bisa. For di1963 Vatikano ta pèrmití kremashon. Den un deklarashon, e Sede Santu ta rekonosé ku ta notabel kon e práktika a plama den vários pais. Djamars Iglesia Katóliko a divulgá e normanan nobo pa ku deramentu di defuntunan i e forma kon mester konservá nan shinishi i di esnan ku ta keda insinerá (kremá). Den e normanan nobo ta prohibí pa stroi e shinishi òf warda esaki den kas. E normanan, ku a keda ilustrá na Vatikano dor di e kardinal aleman Gerhard Ludwig Müller, ku ta prefekto di e Kongregashon pa Doktrina di e Fe. Sa yama e funshon di prefekto, tambe guardian di fe. Según e kardinal, mester mantené shinishi den santana òf den un lugá sagrado. "Asina ta evitá e riesgo ku esnan ku muri, ta keda lubidá dor di nan famia i e komunidat kristian,” e kardinal a splika prensa. "Tambe ta evitá posibel deskuido i falta di rèspèt di parti di generashonnan ku ta sigui,” Müller a enfatisá.
Den kasonan eksepshonal i grave, obispunan lokal por konsedé pèrmit pa konservá e shinishi den kas. Por ehèmpel den kaso di guera, pues ora ku ta difisíl pa dera un familiar ku fayesé, den un santana. Iglesia katóliko ta prohibí di forma rotundo pa uza e shinishi komo rekuerdo, joya òf otro opheto. Ademas ta prohibí tambe pa parti e shinishi pa miembronan di famia. E teksto di Vatikano ta ripití e posishon tradishonal di Iglesia, esta ku ta rekomendá pa kurpanan di esnan ku fayesé, keda derá den santana òf santuario.