top of page

Kasi mitar di e miembronan di Parlamento nobo di Kòrsou, ta hende muhé.


Kasi mitar di e miembronan nobo den Parlamento di Kòrsou. Di e 21 parlamentarionan, 10 ta di e sekso femenino. Ayera a tuma lugá e promé reunion den Parlamento 2016-2020. For di momento ku Kòrsou a bira pais den Reino na 10-10-10, no a sosodé ku tabatin un kantidat asina haltu di hende muhé pareu den parlamento. E dies parlamentarionan hende muhé ta dòbel di e kantidat ku tabatin den e parlamento anterior. E parlamentarionan hende muhénan ku a huramentá na gobernador Lucille George-Wout ayera ta: Giselle McWilliam i Elsa Rozendal pa frakshon di MAN, Jacinta Constancia i Charetti Eduarda Francisca pa MFK, Zita Jesus-Leito i Marilyn Alcalá-Wallé pa PAR, Suzanne Camelia Römer pa PNP, Ruthmilda Larmonie-Cecilia pa PS, Omayra Leeflang di Un Kòrsou Hustu i Marilyn Moses di Movementu Progresivo. Binti di e bintiun parlamentarionan tabata presente debí ku Gerrit Schotte a indiká adelantá, ku pa motibunan di salú, e no por ta presente. Den e parlamento nobo tin tambe tres miembro ku ainda ta forma parti di e gabinete demishonario di Ben Whiteman-II. Nan ta Ruthmilda Larmonie-Cecilia di Ministerio pa Desaroyo Sosial, Labor i Bienestar, Eugene Rhuggenaath pa Ministerio di Desaroyo Ekonómiko i Suzanne Camelia Römer pa Ministerio di Tráfiko, Transporte i Planifikashon Urbano. Pa un periodo di 90 dia e ministernan por keda den ambos funshon, esta komo miembro di parlamento tambe. Despues di e periodo nan mester hasi un eskoho si nan ta sigui komo parlamentario. Ta spera ku pa e temporada ei, ya tin un gabinete nobo pa pais Kòrsou. (foto : Elsa Rozendal)

bottom of page