Ulanda tabata un poko mas sukú den wikènt.


Den fin di siman hopi lugá na Ulanda a paga lus. Easki tabata pa e aktividat “Anochi di Anochi”, e úniko anochi den aña kaminda munisipio i empresanan huntu, ta purba pa ta realmente sukú. E proyekto ta idea di e federashonnan di naturalesa i medio ambiente, ku di e forma akí ke pidi atenshon pa polushon di lus. “Ora bo mira un mapa di anochi di mundu, Oropa ta esun ku mas lus i Ulanda ta esun mas visibel,” asina un di e promotornan a bisa e revista profeshonal ‘Bouwformatie’. Mas aleu el a splika ku tur e iluminashon den anochi ta innesesario, karu i malu pa e medio ambiente. Pa pone atenshon na polushon di lus, djasabra anochi 160 empresa i munisipio rònt Ulanda a paga tur lus. E “Domtoren” na Utrecht tabata den sukú, Tata Steel na IJmuiden a paga tur su lusnan i den sentro di Middelburg tambe tabata kompletamente sukú.

Durante e di diesdos edishon di e evenementu, a organisá aktividat rònt henter Ulanda. Interesadonan por a tira un bista na e ‘sterrenwacht’, hasi un paseo nokturno den kanoa den e kanalnan di Utrecht òf kome den sukú den un restorant. Na tur tabatin 400 aktividat ku ta 50 aktividat mas tantu ku aña pasá. Hopi munisipio a paga lus den ofisinan i a pidi empresanan tambe pa hasi esaki. Dor di paga lus den por ehèmpel garashinan di parker i bòrchinan di propaganda, e polushon di lus por keda redusí drástikamente. Ora paga lus anochi, e shelu yená ku strea ta mas mihó visibel, segun e promotornan di “Anochi di Anochi”. “Asina tur hende por disfrutá di e bunitesa di anochi.”

I debí ku e ora di wenter a drenta riba e dia ei, e eksperensha a dura un ora mas largu.