Segun Gisette Seferina e sangura ku ta transmití Mayaro ta na Kòrsou.


E sangura ku ta transmití e vírus Mayaro ta na Kòrsou. Esaki e entomólogo Gisette Seferina a deklará komo reakshon riba e deklarashonnan robes di epidemólogo Izzy Gerstenbluth. Gerstenbluth a reakshoná riba un vírus misterioso ku a aparesé na Kòrsou i ku posiblemente ta un otro forma di manifestashon di Zika. Dòkter Gerstenbluth a indiká ku e sangura ku ta transmití e vírus Mayaro, yamá Haemagogus, no ta aparesé na Kòrsou. Entre tantu Gerstenbluth a koregí e ponensia aki den un rueda di prensa. Gisette Seferina ta indiká ku e mes a fangu e sangura aki na diferente parti di Kòrsou i ku for di 2012 el a mèldu esaki na Ministerio di Salubridat, Medioambiente i Naturalesa. E sangura Aedes Aegypti ku ta esun ku ta transmití e vírus di Zika, Chikungunya i Dengue tambe por transmití e vírus Mayaro. Esaki a keda afirmá tambe pa sientífikonan di Naval Research Center na Merka. Resultado di un investigashon ku a sali den un revista sientífiko ta mustra ku e sangura Aedes Aegypti tambe por transmití e vírus Mayaro i ku e embergadura por ta mas grandi.