
Mariah Carey ke pa e multimionario James Packer pag’é 50 mion dòler. E kantante ta bisa k’e tin derecho riba e sèn akí, pasó e ta pará den e akuerdo di matrimonio. Sinembargo, Packer i Carey ainda no a firma e akuerdo. Segun Carey, trahadónan di Packer a purba na separá nan. TMZ tin algun email den nan poder ku ta mustra detayenan di e akuerdo. Einan tin pará ku Carey lo a risibí 50 mion dòler si resultá ku e relashon ku Packer kibra promé ku e matrimonio tuma lugá. Tambe tin pará ku Carey mester entrega tur joya ku e la risibí, a ménos ku tin para pretu riba blanku, ku nan tabata un regalo. Carey a haña entre otro un renchi di kompromiso ku ta bal miónes di dòler. Ta parse ku Packer lo kier a kasa ku e kantante dia promé di mart e aña akí, pero Carey ainda tabata ofisialmente kasá ku Nick Cannon. Nan tabatin un seremonia planeá pa e fecha ei i ku despues nan lo a kasá pa lei. Na momentu ku e relashon a terminá, e kasamentu tabata práktikamente kompletamente planeá. Carey tabatin su shimis kaba, invitadonan tambe a risibí nan invitashon i ya a bestèl tur flor. Segun fuentenan awor e kantante tin un relashon ku un di su bailarin nan.