Gobièrnu Venezuela a pone aktivistanan polítiko den libertat.


Komo muestra di bon boluntat, djamars gobièrnu venezolano a laga sinku aktivista polítiko den libertat. E miembronan di oposishon tabata será pa entre otro plama propagandanan ku no a kai masha na agrado di e gobièrnu sosialista. Nan liberashon ta bini despues ku kòmbersashonnan entre gobièrnu i oposishon di e pais suramerikano, a kuminsá pa por kaba ku e krísis polítiko profundo ku ta reina den e pais.

"E promé prezunan polítiko a keda liberá,” asina elider opositor Jesus Torrealba a selebrá riba su kuenta di Twitter. Despues el a añadí den un entrevista, ku esaki ta djis e promé pasonan.

Ainda tin masomenos 100 hende será, pasó nan ta kontra presidente Nicolas Maduro. "E liberashonnan mester sigui tuma lugá,” Torrealba a bisa. "Nan mester duna nos e referèndùm bèk of adelantá elekshonnan presidensial.” Kontrinkantenan di Maduro ta purba baha e presidente via di un referèndùm. E komishon di elekshon a stroba esaki, pasó lo tabatin manipulashon ku e proseso di kolektá firma. Oposishon a disidí pa no tira gasolin riba e kandela. Nan a duna un chènsa na e kòmbersashonnan ku gobièrnu, den kuá Vaticano ta fungi komo mediadó. P’esei tambe a para un marcha ku tabata planiá pa bai finalisá na palasio presidensial den e kapital Caracas.