
Un seri di kòmbersashon entre paisnan produktor di petroli, no a logra pa yega na un akuerdo pa limitá produkshon i asina oumentá preis di petroli. Mientras e akuerdo pa tanten redusí e produkshon ku 2% ta den peliger. Durante deliberashonnan nobo a bin sali afó ku Irak i Iran no ke limitá nan propio produkshon. Iran, ku resientemente a haña pèrmit pa por bende petroli riba merkado internashonal, ke sigui subi su produkshon te na 4.2 mion barí pa dia. Pa por alkansá e nivel aki, mester subi e produkshon diario ku 400.000 barí. Irak di otro banda a indiká ku e no por sin e entrada di produkshon di petroli debí ku e ta den guera kontra Estado Islámiko (ISIS).
Miembronan di e kartel di petrolí (OPEC) a mira nan entradanan baha konsiderabel den e último añanan debí di e preis abou di petroli. Dor di palabrá pa produsí ménos, nan ke fòrsa preisnan mas altu pa e kumpradónan.