Klínika Capriles ta ketu bai den problema finansiero.


E situashon finansiero di Klínika Capriles no a mehorá. Resientemente, gerensia a sinta ku minister demishonario di salubridat, Siegfried Victorina, pero e reunion no tabata tin niun resultado konkreto. Ainda e instituto no tin niun solushon struktural pa e défisitnan finansiero. E medida aktual, esta pago di salarionan dor di SVB, ainda ta bálido. Esaki ta enserá ku mensualmente ta retené 300.000, di e 1.6 mion florin di e supsidio di gobièrnu, loke ta pone ku ta sobra ménos ainda, siendo ku ya kaba loke ta haña no ta sufisiente.

Manera ta konosí, e instituto tin basta problema finansiero ku a kuminsá na momentu ku Klinika Capriles mester a paga VUT i “duurtetoeslag” (adaptashon riba salario pa motibu ku kosto di bida a subi) di nan trahadónan. E suman total a akumulá for di momentu di independisashon di e instituto. E primanan aki a keda pagá na APC (ántes APNA). Direktor di e instituto, Waldi Oostburg a splika ku e gastunan aki, nunka a ser prosesá den e tarifanan pa pashènt ku ta keda den e klínika pa tratamentu. SOAB a yega di proponé pa adaptá e tarifanan, pero gobièrnu nunka a evaluá ni apliká esaki.

Otro desventaha ta e echo ku hustisia no a paga su kuentanan pa e pashèntnan kondená, ku a keda interná den e klínika. Dia 22 di sèptèmber, APC a laga pone beslag riba e kuenta bankario di e klínika. Un parti di personal a disidí di pone trabou abou, ya ku nan a haña informe ku no tin sèn pa paga salarionan fin di luna. Finalmente SVB a paga tur salario.

Bosero di Klínika Capriles, Milangela Conquet ta indiká ku nan ta warda riba e minister nobo ku lo tin su sinta, pa wak si kisas ta bini un solushon.