
Hensley Koeiman a manda un karta pa promé minister demishonario Ben Whiteman kaminda e ta urgí Whiteman pa para tur nombramentu polítiko i pa no komprometé e gobièrnu nobo ku nada. Koeiman a referí entre otro na desaroyonan rondó di Hospital nobo i kombersashonnan ku un grupo chines pa invershonnan kuantioso den sektor di refinashon di zeta i sektor di energia na Kòrsou. E karta a bira tópiko di diskushon den e arena polítiko. Ben Whiteman a reakshoná asombrá riba e karta i lider di MAN. E minister demishonario a duna òrdu pa un tim multi-disiplinario bai China i el a indiká aki ta trata di un kaso ku ta andando. Ademas Whiteman a bisa ku na momentu ku a entrega retiro, gobernador a bisa bon kla ku nan mester sigui riba nan puesto i hasi e trabou di atendé tur kos ku tin di aber ku gobièrnu te na momentu ku e gobièrnu nobo sinta. Según Whiteman no por interumpí gobernashon i laga tur kos para. E delegashon a bai China despues ku a firma un akuerdo orientativo (MOU) ku e grupo chines Guandong Zhenron, nèt promé ku elekshon a tuma lugá. Si no yega na nada konkreto e MOU lo kaduká, pero mester trata na duna esaki kontenido segun Whiteman. Formador Kenneth Gijsberta ta di opinion ku ta normal ku un gobièrnu nobo por pidi pa no komprometé e gobièrnu nobo ku nada, sigur si tin partido di oposishon den dje. El a indiká ku den e kaso aki, tres partido ku ta den gobièrnu kaba, esta PAR, PNP i Pueblo Soberano huntu ku MAN ku lo uni pa forma un gobièrnu nobo. Mas aleu Gijsbertha a bisa ku a pone partnernan di koalishon nobo na altura di e karta ku a bai pa e promé minister demishonario Ben Whiteman. Lider polítiko di MFK, Gerrit Schotte tambe a hasi un apelashon na Whiteman pa stòp ku nombramentu di hende i toma di desishonnan irevokabel den e aktual fase demishonario di gobièrnu.