CURA+ ta alertá pa peliger, debí na falta di remedi pa HIV.


E manera kon e botika di SEHOS (Sint Elisabeth Hospital) i algun importadó di remedi pa pashèntnan ku tin aids, ta trata, a lo largo por peligrá bida di e pashèntnan. Asina e organisashon CURA+, ku ta sali na interes di pashèntnan ku aids, ta bisa den un komunikado. E organisashon ta bisa ku den e lunanan tras di lomba, tantu e botikario di SEHOS, komo importadónan, no por a entregá remedi pa e pashèntnan na tempu, loke a kondusí ku e internista ku ta atendé e pashèntnan ku HIV mester a preskribí un otro remedi. CURA+ ta lamentá ku a manda sienrto pashèntnan kas, sin remedi i pió ainda, no por a bisa nan tampoko pa ki dia nan lo bolbe haña nan remedinan. Lo e organisashon ta kondená ku tin sierto importadó ku tin remedi na stòk, pero ta ninga di suminitrá SEHOS, pa motibu di pagonan atrasá. Esaki ta kontra interes di e pashèntnan. Ademas e asuntu di duna pashèntnan otro remedí pa tan ten, ta peligrá bida di e pashènt ku HIV. Debi ku hopi biaha pashèntnan ku e malesa di HIV no ta tribi di bai públiko ku nan problema, e asuntu por a bira pio. CURA+ ta haña tambe ku tantu SEHOS, komo e importadónan, mester a envolví e organisashon, na momentu ku e situashon a surgi. CURA+ ta splika ku nan ta lamentá tambe ku e tarifanan pa remedi di HIV ta demasiado haltu; kasi igual ku e tarifa na Ulanda. I nunka gobièrnu no a hasi nada pa bin na remarke pa logra un tarifa karibense serka importadónan. E organisashon a manda un karta pa minister di salubridat, SEHOS, importadónan, Ombudsman i Fundashon pa Konsumidó, tokante e situashon. Ademas nan ta urgi tur pashènt ku HIV pa mèldu nan situashon di forma anonimo na 676 66 77