CNN ta retirá komentarista ku a duna Hillary Clinton informashon.


E kadena di televishon CNN a distansiá su mes for di e komentarista Donna Brazile, despues ku a sali na kla ku Brazile a pasa informashon tokante preguntanan di debate, pa Hillary Clinton. Djaluna CNN a bisa ofisialmente ku na a kòrta e relashon ku Brazile, despues ku a Wikileaks a públiká loke a pasa tras di kòrtina. “Nos tin hopi problema ku e hecho ku el a duna e tim di kampaña di Clinton informashon, mientras ku e tabata komentarista pa CNN,” asina bosero di CNN, Lauren Pratapas a bisa den un promé reakshon. Den pasado Wikileaks a revelá kaba ku Brazile tabatin kontakto ku John Podesta ku ta lider di kampaña pa e kandidato demokratá. “Sa sosodé ku mi ta haña e preguntanan adelantá.” Asina Brazile a bisa Podesta na mart. I a añadí, “lo mi manda algun mas”. CNN a bisa ku nan no tabata na altura i nunka nan no a duna Brazile informashon tokante preguntanan, lista di invitado òf otro informashon adishonal relashoná ku e debatenan ku CNN a spònser. Brazile ta komentarista pa e kadena di televishon ABC tambe, ku no a duna niun komentario tokante e kaso. Djaluna Donna Brazile a “tweet” : “Danki CNN. Ta un honor pa ta un stratego demokrátiko i komentarista pa e kanal. Eksito na tur mi koleganan”. CNN a bisa ku despues di elekshon na lo resumí kontakto ku Brazile.