DJ Moortje i MC Pester su “bubbling” ta haña rekonosimentu internashonal. (VIDEO)


E ritmo di musika “bubbeing” a hasi un impakto enorme riba músika internashonal. Asina didjeinan (dj) famoso i sientifikonan di músika na universidat di Harvard na Merka, ta splika den un dokumentario, ku a keda públiká resientemente. “Bubbling Bandje 64”, ku ta trata e pioneronan den e genero di músika bubbling. Durante di Amsterdam Dance Event a estrená e dokumentario den kuá dj-nan di fama mundial, manera Hardwell, Afrojack i Chuckie ta papia di e influensia fuerte ku e músika tabatin riba nan i e éksito di nan karera. Na komienso di añanan 80 DJ Moortje i MC Pester a hiba “bubbling” Ulanda. E duo a kuminsá primeramente den diskoteka The Sound ku tabata keda pegá ku viadùkt na Otrobanda na Kòrsou. Moortje, na un manera úniko tabata drai e diskonan di e ritmo “dancehall” riba un spit mas haltu i asina el a krea un genero musikal nobo. MC Pester na su turno tabata rèp tekstonan kontroversial. Ta sali for di e pensamentu ku ta MC Pester ta esun ku a introdusí e bailá di “billenshake” i “schuren” riba e ritmo di bubbling. Aktualmente e pelíkula di e periodista Sanderijn Loonen i Wensly Fransisco ta haña hopi atenshon den media ulandes. Durante di e popular “Museumnacht” riba sinku di novèmber lo ripití e obra den Stadsarchief na Amsterdam. Segun e produktornan, ta e idea pa pronto pasa e pelíkula “Bubbling Bandje 64” na Kòrsou tambe.