Brasil ta manipulá muskitanan pa kombatí Zika.


Sientífikonan na Brasil kier saka miones di sangura genétikamente manipulá pa kombatí sanguranan ku ta karga malesanan tropikal. E intenshon ta pa meskla e sanguranan manipulá akí ku esnan di nan sorto i despues laganan prokreá. E larvanan ku nan produsí lo muri lihé dor di un defekto. Despues e insektonan tambe lo muri. Esaki mester kombatí e ekspanshon di Zika, keintura hel, dengue i chikungunya.

E sanguranan a ser manipulá dor di e empresa britániko Oxitec. Segun direktor di e empresa, Hadyn Parry, nan por produsí den nan establesimentu na Piracicaba un kantidat di sesenta mion sangura kambiá, pa siman. Entre 2011 i 2014 eksperimentunan di e empresa a demostrá ku e sanguranan di keintura hel a baha ku un 90 porshentu, despues ku nan a saka e sanguranan kambiá. Ainda e empresa no tin aprobashon di outoridatnan brasileño. E direktor ta spera ku den 2017 nan lo haña aprobashon pa saka e sanguranan. E siudat Piracicaba te ainda ta e úniko kliente di e empresa, pero segun e direktor nan lo papia ku mas munisipio i provinsianan. Brasil ta luchando ku konsekuensianan di e malesanan ku e sanguranan ta plama. Na 2015 tabatin 1.6 mion kaso di keintura hel. Na yüli di e aña akí ya tabatin mas ku 1.4 mion kaso. Den e mesun periodo a registrá 174 mil kaso di Zika den e pais. E vírus di Zika ta afektá beibinan ku ta nase ku un kráneo muchu chikí i serebro ku no ta desaroyá.