E tim di kòntròl ekonómiko multifasétiko di Fundashon Wega di Number Kòrsou, huntu ku Departamento di Asuntunan General i Hurídiko di gobièrnu, a sera sinku kantor di number grandi di Curaçao Lottery. Según Ronny Cornelis, ku ta enkabesá e tim di kòntròl, mester a yega na e medida drastiko, debi na falta di kumplimento di e rifero. E rifero tin debe di OB i tambe serka e Fondo di Garantia. Esun ku tin e pèrmit a sera un areglo masha faborabel pa pago di un debe mionario. E areglo ta di tal forma ku aki 20 aña ainda e rifero no a kaba di paga, mientrás e debe ta sigui krese. A ofresé e rifero pa paga sinku mil florin pa luna. Ademas e rifero a purba drenta un areglo tambe pa loke ta e deposito ku e mester hasi den e Fondo di Garantia di Fundashon Wega di Number Kòrsou. Sinembargo esaki tampoko ta aseptabel pa outoridatnan, debí ku e montante ta un garantia ku tur rifero mester paga den un biaha. Según e funshonario di MEO, durante e akshon nan a topa dokumentonan di Ontvanger di Kòrsou di ta bisa ku e rifero no tin niun debe na servisio di impuesto, siendo ku e realidat ta otro. No ta konosí kon e rifero a yega na e dokumento i entretantu a start un investigashon riba e kaso.