Trump ta hinka hopi sèn den su mes kampaña.


Donald Trump a hinka 10 mion dòler di su mes sèn den su kampaña elektoral, asina dos di su konseheronan a bisa “The Wall Street Journal”. Ademas lo usa 25 mion dòler pa kumpra propaganda na televishon den estadonan kaminda tantu e republikano Trump komo e kandidato demókrata Hillary Clinton tin chèns pa gana, esta Florida, North Carolina, Ohio i New Hampshire. E propagandanan nobo lo ataká Clinton i su famia. Nan ta akus’é di ta un ‘insider’ i ku famia Clinton a enrikesé nan mes. Na tur Donald Trump a hinka masoménos 66 mion dòler di su mes sèn den su kampaña. Anteriormente el a bisa ku e lo invertí 100 mion dòler den e kampaña elektoral, pero ainda e no a yega e montante ei. Segun e korant, na e momentunan akí Clinton tin kuater biaha mesun tantu sèn den su kaha di kampaña ku esun di Trump.