Ekonomia di Kòrsou a baha ku 0.2%, miéntras ku na Sint Maarten esaki a baha ku 0.3 %, segun e informe trimestral di Banko Sentral di Kòrsou i St. Maarten. Tur dos país a registrá un inflashon negativo (-0,2%) pa motibu di redukshon di preisnan di petróleo riba merkado internashonal.
E bahada di e Produkto Interno Bruto (BBP) di Kòrsou, tabata debí prinsipalmente na ménos aktividat den sektornan di restorant, hotel, industria i transporte, depósito i komunikashon.
E bahada di mas grandi a keda registrá den e sektor di restorant i hotel. Ademas pa motibu di ménos aktividat di rafiná produkto na Refineria Isla, kombiná ku ménos aktividat den reparashon di barku (DOK) tabatin un bahada den e sektor akí tambe. E kontribushon na e sektor di transporte, depósito i komunikashon na BBP real, tabata negativo, pasobra tantu aeropuerto komo nos puertonan di haf a presta malu. Esaki a sosodé pa motibu di un bahada den konsumo di turistanan, kombiná ku tiki aktividat den Zona Liber.
E krempmentu ekonómiko a keda limitá parsialmente dor di kresementu den sektor di konstrukshon, servisio finansiero i utilidat. E kresementu den sektor di konstrukshon, tabata basá mas riba invershon privá i invershonnan di gobièrnu. Den sektor di servisio finansiero tambe, e balor agregá real a oumentá komo konsekuensha di un kresementu den servisio finansiero lokal, balansá dor di un bahada den servisio finansiero internashonal.
Pa loke ta trata sektor di turismo, mester menshoná ku den e di dos kuartal di 2016, ta resaltá e bahada enorme den turismo for di Venezuela, basá riba e situashon polítiko den e país. Ta hasiendo hopi esfuerso pa trese turista for di Merka i Europa, pa asina por kontrarestá e situashon aktual na nos pais. Ademas ta tumando pasonan konkreto den e parti di infrastruktura pa hasi Kòrsou mas atraktivo i asina atraé turistanan pa bini nos país.
Nifikashon : Produkto Interno Bruto (BBP) = “Bruto Binnenlands Product” ku ta e balor total di plaka di tur loke ta produsí den un pais (na servisio i produkshon) durante un aña. Ta balorá esaki konforme preisnan di merkado.