Don Martina ke pa Minister di Ekonomia atendé krio di bestia i agrikultura na Kòrsou.


Don Martina ke pa pone LVV, bou di minister di asuntunan ekonomiko. E èks lider di Partido MAN, ku awendia ta aktivista pa agrikultura i krio di bestia, a reakshoná riba deklarashon di e aktual minister di ekonomia Eugene Rhuggenaath. Segun minister Ruggenaath, aktualmente agrikultura i krea di bestia no ta representá ni 1% di Kòrsou su Produkto Bruto Nashonal. Esaki ta hasi e isla vulnerabel i dependiente di importashon di fruta i bèrdura. E efektonan ku Kòrsou ta sinti awor ku tin falta di fruta i bèrdura, debí na e krisis na Venezuela, ta prueba di esei. For di 2008, Don Martina a bin ta atvertí pa e falta di vishon riba tereno di produkshon di kuminda propio. Martina ta spera ku e gobièrnu nobo lo tin mas atenshon pa tema, pero tambe pa por ehèmpel e infrastruktura pa fangu awa na Kòrsou. Segun Martina 80% di paisnan na mundu a disidí ku nan ta bai atendé ku preservashon di awa, pero Kòrsou no ta den e grupo ei. Kòrsou tin un retraso di por lo menos 15 aña riba e tereno di maneho di awa. P’esei Don Martina ta boga pa minister di ekonomia atendé ku agrikultura i krio di bestia. Esaki ta evitá e maneho deskabeyá ku tin aktualemente, kaminda un ministerio ta atendé ku asuntunan di awa, mientras un otro ministerio ta laga dèmpel damnan pa traha kas pa pueblo. Martina ta spera ku e gobièrnu i parlamento nobo ta tuma desishon i fiha un vishon konkreto pa krio di bestia i agrikultura.