Brasil ta habri e promé refugio pa olefante.


Brasil a habri e promé refugio na Latino Amérika pa olefantenan ku antes tabata kaptivo. Un refugio idíliko ku eventualmente por akapará 50 olefante. Elephant Sanctuary Brazil ta keda den e parti sentral di Brasil na e estado di Mato Grosso. El a keda fundá pa e fundashon Global Sanctuary for Elephants i ya kaba tin su dos promé habitantenan. E olefantenan Maia i Guida, ku a pasa e último kuater dékadanan kaptivo, a yega e refugio siman pasá. E olefantenan a biba 40 aña ku un sirko. Pa e último 5 añanan nan tabata mará na nan pata na un kadena riba un finka ku ta pertenesé na e abogado di e sirko. Tabatin un waya kayente i unu eléktriko entre e dos olefantenan ku tabata afektá nan si nan mishi ku nan. Esaki a kousa basta agresividat entre e olefantenan. Despues di a yega e refugio no a nota señal di agreshon entre e dos olefantenan. Tin un kantidat grandi di olefante ku ta warda pa por bini e refugio. E siguiente habitante di e refugio por ta Ramba. Un olefante ku aktualmente ta biba na Chile. E tereno kaminda a traha e refugio tabata antes un finka pa baka. E área ta masoménos 2.800 hèktar i a keda kumprá pa e fundashon por duna espasio na 50 olefante ku ta biba den kondishonnan penoso, den entre otro zoológiko òf sirkonan den Latino Amérika.