Trump ke pa investigá Obama tambe den asuntu di i-meilnan di Clinton.


Donald Trump ke pa bin un investigashon tokante e ròl di presidente Obama den e kondukta di i-meil di Hillary Clinton. Durante e temporada ku e tabata minister el a manda hopi meil komersial via un server privá, na lugá di usa servernan di estado merikano.

Trump a bisa agensia di prensa Reuters ku e ta pensa ku Obama tabata sa tur kos tokante di esaki. Ta p’esei e ta tuma parti pa Hillary, pasó e no ke ser lastrá den e kuestion akí. Esei ke men ku mester hasi un investigashon en kuantu su ròl. Kas Blanku no ke reakshoná riba e ekspreshonnan di Trump.

Durante e periodo ku Clinton tabata minister di Asuntunan Eksterior bou di presidensia di Obama, entre 2009 te ku 2013, el a manda hopi emeil komersial via un server privá. Segun krítikonan di e manera akí Clinton a skapa su kurpa intenshonalmente pa evitá supervishon parlamentario. Clinton a pidi despensa pa loke a sosodé. FBI a haña su manera di traha ekstremadamente deskuidá.