Mientras ku e ta sospechoso, Elmer Wilsoe no ta interesá pa drenta parlamento.


Debí ku ainda e ta sospechoso den e kaso “Maximus”, parlamentario Elmer Wilsoe a bisa Partido Pueblo Soberano ku e no ta na disposishon pa drenta parlamento. Parlamentario Wilsoe tabata number 4 riba lista di Pueblo Soberano den e resiente elekshon. “Ami a bisa partido ku lo mi no aseptá niun puesto komo parlamentario te na momentu ku mi no ta sospechoso mas den e kaso. Mi a konfirmá esaki,” asina “Kadè” Wilsoe a bisa durante un konferensia di prensa ku el a tene na sede di e partido. Partido Pueblo Soberano ta den e proseso di formashon i Wilsoe ta di opinion ku mester ta kla pa tur hende ku e no ta bai den parlamento. Esaki lo nifiká ku eventualmente e number sinku riba lista, Sherwin Leonora lo por drenta parlamento. Durante e rueda di prensa, Wilsoe a papia tokante e lèkmentu di dokumentunan di RST. Ademas e parlamentario a sigurá ku e ta inosente. No opstante ku e ta lamentá e manera kon kosnan a bai, Wilsoe a pone bon kla ku e no tin miedu, ni di Ministerio Públiko ni di fiskal Rip. “E no por kibrami tampoko, paso mi tin karakter sumamente fuerte,” asina Elmer Wilsoe a deklará na prensa.