Gobernadó a pidi Kenneth Gijsbertha pa forma gobièrnu entre MAN, PAR, PNP i PS.


Den un komunikado, Gobernadó Lucille George-Wout ta bisa ku djabièrnè 28 di òktober informadó Kenneth Gijsbertha a entregá su relato. Den e relato e informadó a indiká na Gobernadó ku e partidonan MAN, PAR, PNP i PS a yega na un akuerdo pa forma un gobièrnu nobo pa Kòrsou. Huntu e partidonan tin un mayoria di 12 asiento den Parlamentu. E kuater partidonan a proponé na Gobernadó pa nombra Kenneth Gijsbertha komo formadó. Gobernadó na su turno a pidi Kenneth Gijsbertha pa tuma e tarea komo formadó. Gobernadó a pidi Gijsbertha pa forma un gobièrnu basá riba akuerdonan transparente i stabilidat polítiko. El a pidi pa partidonan yega na un programa di gobernashon, basá riba e puntonan di atenshon ku a bin dilanti den e enkargo di informadó. Ademas mester tene kuenta ku lei di integridat den e tarea pa yega na ministernan ku kapasidat i determinashon pa goberná. Dia 10 di novèmber Gobernadó ta spera di risibí un relato di e formadó i a pidi Kenneth Gijsbertha pa mantené informá segun e proseso di formashon ta kana.