Otro luna Sting por pone e American Music Award (AMA) tambe den su kashi di premionan. E músiko britániko lo keda kondekorá na Los Angeles ku e presigioso American Music Award of Merit. Sting lo aktua tambe durante di e entrega di premio na Los Angeles, asina e organisashon a anunsiá. Sting lo kanta un ‘medley’ di su hitnan di mas grandi i tambe su single nobo “I Can’t Stop Thinking About You” for di su álbum nobo “57th & 9th” ku lo sali dia 11 di novèmber próksimo.
E premio spesial di American Music Award of Merit ta pa artistanan ku a duna un aporte partikular na industria di müzik. Na 2008 Annie Lennox tabata e último artista ku a risibí e premio. Den pasado e kondekorashon a bai pa artistanan manera Garth Brooks, Johnny Cash, Gloria Estefan, Whitney Houston, Janet Jackson, Michael Jackson, Billy Joel, Bon Jovi, Paul McCartney, Willie Nelson, Prince i Frank Sinatra. American Music Award ta tumá luga dia 20 di novèmber na Los Angeles. Bruno Mars lo habri e show. Ta spera riba e anochi ku Drake lo ta e artista ku mas chèns pa gana varios premio, debí ku e tin un kantidat rèkòrt di 13 nominashon.