Chicago Cubs ta empatá Seri Mundial.


Chicago Cubs E kachoronan di Chicago Cubs, djarason anochi, a gana e di dos partido di Seri Mundial ku skor di 5 pa 1. Esei ta trese e ekipo di béisbòl, den e seri –mihó di sinku- kontra e indjannan di Cleveland, na e posishon empatá na 1-1.

E serie a kuminsá djamars ora e indjannan di Cleveland a gana komodo ku skor di 6 pa 0, pero e siguiente dia dilanti nan propio públiko, Cleveland no por a keda kla ku e picheo di Jake Arrieta. Arrieta no a pèrmití niun hit den mas ku 5 entrada. Di e forma ei el a kontribuí na e viktoria di Chicago Cubs ku ta den Seri Mundial atrobe for di 1908.

Djabièrnè e ekipo di Chicago, ta bai hunga e promé partido di den final dilanti nan propio públiko. Despues di 108 aña ta sigur algu ku mènezjer Joe Maddon tin masha gana di eksperensiá. "Ta bai bira un lokura total. Normalmente ta asina kaba, pero dor di e viktoria di djarason, e ta bai bira un poko mas loko. Ta bai bira un eksperensia speshal i inkreibel,” asina Maddon a deklará despues dje viktoria.

Tantu e indjannan di Cleveland komo e kachoronan di Chicago, a warda basta aña pa un título di MLB. Cleveland a gana un título pa último bia na 1948 i pa Chicago ta for di 1908 nan tabata e mihó tim den beisbòl merikano.