Banko Sentral (CBCS) a legumai huisio sumario kontra Ministerio Públiko.


Banko Sentral pa Kòrsou i St. Maarten (Centrale Bank van Curacao en St. Maarten-CBCS) a kanselá e huisio sumario ku e entidat a entamá kontra Ministerio Públiko. Meta di e huisio sumario tabata pa prohibí Ministerio Públiko hasi uso di material ku nan a konfiská durante redada na Banko Sentral. E banko ta alegá ku ta trata di un kaso di karakter privá kontra presidente di Banko Sentral, Emsley Tromp. E materialnan a keda konfiská dia 6 di òktober. Ta akusá presidente di Banko Sentral, Emsley Tromp di a komete froude fiskal i labamentu di plaka den ámbito privá.

Bosero di Ministerio Públiko, Norman Serphos a konfirmá ku el a komprendé ku a para e huisio sumario. Bufete di Abogado Spigt Dutch Caribbean, ku ta representá CBCS, no a duna niun deklarashon riba e kaso. Djarason, dia 10 di ougùstùs último a kuminsá ku e investigashon kontra Emsley Tromp. E presidente direktor mes a baha ku fakansi i durante su ousensia Jerry Hasselmeyer, ku ta miembro di gerensia di CBCS, ta remplas’é.

E investigashon kontra Tromp a haña e nòmber “Saffier”.