Tin un kantidat di hende na Kòrsou ku ta sufri di un virus deskonosí. E pashèntnan ta yega nan dòkter debí na sintomanan ku parse Chikungunya. Nan ta keha di kentura, doló di wesu i kueru afektá. Konsekuentemente a tèst e pashèntnan riba malesanan manera Chikungunya, Zika i Dengue, pero tur e resultadonan tabata negativo. E vírologo yu di Kòrsou, Byron Martina, ke investigá, si kisas ta trata di e virus Mayaro, ku ta relativamente deskonosí. Martina ke sa tambe, si e pashèntnan mes tin un sistema di defensa, debí ku den pasado el a ser trata pa Chikungunya. Sinembargo Martina ta kere ku e chèns ta relativamente chikí ku ta trata di e virus Mayaro. “E virus ei hopi biaha ta paresé den paisnan ku tin mondinan grandi kaminda tin entre otro makaku. Paisnan manera Brazil i Trinidat. Pues bo no ta spera e virus aki banda,” asina e vírologo ta indiká. Mayaro ta un virus ku ta ser transmití pa un otro tipo di sangura, kontrali na esun ku ta transmití Chikungunya, Dengue i Zika. “Pero, basá riba investigashonnan di laboratorio, nos ta konsiente ku virusnan tin tendensia di adaptá nan mes na sanguranan nobo. Ademas despues di pasashi di orkan Matthew den Karibe, e ambiente ta ideal pa sanguranan i si e virus ta adaptá su mes na e sanguranan nobo, nos tin un problema,” asina e virologo Byron Martina a bisa. Dòkter Byron Martina, ta bai ku algun muestra pa hasi pruebanan ku virus Ulanda, pa por studia esakinan. Dòkter Martina a reuní ku epidemilogo Dr.Izzy Gerstenbluth di GGD pa krea un struktura pa fasilitá e investigashon na Ulanda.