Sientífikonan a haña base militar Nazi.


Resientemente a redeskubrí, un base militar Nazi sekreto bandoná mas ku 70 aña pasá. Sientífikonan ruso a haña e base situá riba e isla ártiko di Alexandra, asina e korant The Independent ta raportá. E isla Alexandra a sirbi komo un stashon táktiko di wer, pa e Nazinan durante di dos guera mundial, ora ku konosementu di wer tabata vital pa determiná ki ora ta move ku e trupa, ekiponan di guera i barku. Debí na nòmber dje base "Schatzgraber" òf "Treasure Hunter", algun ta kere ku a uzé tambe pa mantené sierto relikia antiguo.

Tin indikashon ku a konstruí e base na 1942, e mésun aña ku Adolf Hitler a invadí Rusia. Sinembargo e Nazinan ku tabata stashoná ei nan, a keda fòrsá pa bandoná e pòst na 1944, ora ku nan a keda venená, dor di kome karni kontaminá di bernan polar. Un barku supmarino a reskatá e habitantenan ku a bira malu na e base, pero a laga hopi provishon atras. Sientífikonan a deskubrí munishon, patronchi, bleki di gas i dokumentu. Tur loke nan a haña a keda konservá di forma intakto, debí na e temperatura ekstremadamente friu di ártiko.