Polis brasileño a arestá e polítiko Eduardo Cunha, sospechá di korupshon. Komo presidente di delegadonan Cunha tabata protagonista prinsipal pa fòrsa èks-presidente Dilma Rousseff pa baha. Segun korantnan brasileño, Cunha ta sospechá di a tuma miones di plaka di soborno di Petrobas. Ademas ta akusé di labamentu di plaka i di a skonde e plaka riba kuentanan na Suisa, asina AFP ta menshoná.
Cunha (58) tabata forma parti di e movementu konservativo i evangéliko. E tabata konosí komo un hende ku ta regla kos hopi lihé den polítika brasileño. Ta e a kuminsá e proseso ku a resultá den bahamentu di Rousseff, pa motibu ku a kulpa Rousseff di a surpasá e presupuesto di gobièrnu. E ex-presidente tabata sospechá Cunha di a plania un gòlpi di estado.
E triunfo di Cunha tabata masha kòrtiku pa motibu di sospechonan di korupshon. Na sèptèmber el a pèrdè su lugá den kongreso i tambe su outoridat den parlamentu. Cunha ta desmentí tur e sospechonan nobo.
Wes Sergio Moro, ku a pidi e detenshon, ta bisa ku e posibilidat pa Cunha hui ta grandi, konsiderando su rekursonan sekreto na otro banda di oseano i su nashonalidat dòbel.
E empresa petrolero di estado Petrobas, ku a ser menshoná den e akusashon kontra Cunha, ta enbolbí den un skandal di malversashon. Ta p’esei na Suisa a disidí awor ku Brasil ta haña akseso na kuentanan bankario di polítikonan brasileño i funshonarionan haltu di Petrobas, segun Reuters. Anteriormente e petishon ei a ser rechasá dor di un korte federal suiso.
E investigashon brasileño riba malversashon a revelá korupshon sistemátiko na nivel haltu, serka mas kompania di gobièrnu. E sospechonan a kondusí na protestanan den henter pais.
Akusadónan suiso ta bisa ku lo a haña informashon di mas ku 340 relashon bankario sospechoso. Ademas a kuminsá ku masoménos sesenta investigashon i a fris kuentanan bankario na un balor total di masoménos 800 mion dòler for di 2014. Outoridatnan suiso a pidi dokumentonan ku tin konekshon ku mas di mil kuenta na sigur di kuarenta banko suiso.