Konseho Supremo Elektoral a risibí konfirmashon di 17 di 21 parlamentario ku a keda elehí durante elekshon di 5 di òktober último. Entre e 17 parlamentarionan tin 3 minister, Suzanne Camelia-Römer, Ruthmilda Larmonie-Cecilia i Eugene Ruggenaath. E tres mandatarionan ta haña tres luna di tempu pa funshoná tantu komo parlamentario i komo minister. E kuater parlamentarionan ku falta pa konfirmá ainda, ta di MFK. Nan tin dos siman di tempu ainda, pa aseptá nan status di parlamentario. Despues ku e Parlamentu nobo sinta, lo eliminá tur e papelnan di votashon. Ademas Konseho Supremo Elektoral lo traha un rapòrt ku entre rekomendashon na gobièrnu, pa loke ta e sistema elektoral di Kòrsou. Un di e konsehonan ta pa aselerá e proseso pa independisá Konseho Supremo Elektoral, asina Raymond “Pacheco” Römer, ku ta presidente di Konseho a bisa Extra. Finalmente Römer a bisa ku nan e keda den e kuadro finansiero ku a presupuestá pa organisá elekshon.