E tribunal haltu spañó a kita e prohibishon pa korida di toro den e region di Cataluña segun un informe di AFP. Di e forma akí, e desishon di parlamentu di Cataluña di yüli 2010, pa prohibí korida di toro, a keda desbaratá. Korte a dikta ku no a tene na kuenta e balor kultural di e koridanan di toro. Esnan enbolbí den koridanan di toro a indiká ku e prohibishon lo tin un daño ekonómiko di sigur 300 mion euro. Oponentenan di e tradishon bieu a splika ku e montante lo tabata hopi ménos. E prohibishon tabata na vigor for di 1 yanüari 2012. E último korida di toro a tuma lugá 5 aña pasá den e arena “La Monumental” na Barcelona. Den añanan promé ku esei, e koridanan tabata atraé ménos públiko, miéntras protestanan di protektornan di animal a oumentá.