Wes a dikta ku México por ekstraditá “El Chapo” pa Merka.


Un wes na México a dikta, ku e pais por èkstraditá e lider dje kartel di Sinaloa, Joaquín “El Chapo” Guzman. Mesora e abogadonan di “El Chapo” a apelá e sentensia. Segun e wes, e ponensianan tresé pa abogadonan defensor di Guzman a keda rechasá i porlotantu México por ekstraditá e kapo di droga. Ta akusá “El Chapo” di entreotro narkotráfiko, labamentu di plaka i tambe homisidio, den sigur 6 estado na Merka. Ku e desishon nobo di wes, e úniko opshon ku a keda pa evitá ekstradishon di “El Chapo” ta di apelá. Den un promé reakshon pa Univision, djis despues di e veredikto, e abogado di Guzman, José Refugio Rodríguez, a splika ku nan lo sigui bringa te na último pa evitá e ekstradishon. “E último palabra no ta na e wes, sino e tribunal di revishon. Ademas si nos por proba ku tin violashon di derechinan humano, nos por sigui bai te Korte Internashonal. E guera aki falta hopi bataya ainda,” asina Rodriguez a bisa. Despues ku “El Chapo” a huí na vários okashon, na mei último a transladé pa e prizòn di máksimo siguridat El Altiplano al Centro Federal de Readaptación Sosial, na e siudat di Juarez. Na yanuari a kaptura “El Chapo”, ku ta ser konsiderá komo e narkotrafikante mas buska na mundu.