
Durante e di tres i último debate na Merka, Donald Trump a bisa ku e no sa ainda si e lo aseptá e resultado di elekshon. E ekspreshon ei a kousa un impakto ku mester mira ainda den kiko lo e resultá. "Ta espantoso ku e kandidato di un dje partidonan grandi den elekshon ta tuma un posishon asina," Hillary Clinton a reakshoná despues ku Trump no kier a bisa ku e ta aseptá e resultado di elekshon. Di otro banda Trump su yu muhé i tambe su ko-kandidato a indiká anteriormente ku nan lo aseptá e resultado.
Durante e último debate entre Donald Trump i Hillary Clinton na Universidat di Las Vegas, e kandidatonan a trata diferente tópiko manera abòrtus, ekonomia, frontera, kombatimentu di terorismo i e ròl ku supuestamente Rusia ke hunga den elekshon na Merka.
E debate a start, sin ku e kandidatonan a duna otro man. Kontrali na e debatenan anterior, e nivel di e debate tabata mas mihó. Esaki segun analistanan tin di haber tambe ku e bon intervenshon di e moderadó Chris Wallace di Fox News.
Votashon adelantá a start kaba den varios estado na Merka. Dia 8 di novèmber tin elekshon pa un presidente nobo na Merka.