Rebendedónan di fruta i bèrdura tin problema pa haña fruta for di Venezuela. I no tin un indikashon ku por lo pronto tin un solushon pa e situashon. Asina un rebendedó a bisa Extra. Gobièrnu di Venezuela a pone prohibishon pa eksportá fruta i bèrdura, debí na e situashon na Venezuela. Algun siman pasá a krea e impreshon ku e problema lo a keda solushoná den fin di siman ku a pasa, pero ora ku rebendedónan a tene kontakto ku Venezuela, nan a haña di tende ku no tin fruta for di Venezuela por lo pronto. Aktualmente tin skarsedat di milon, patia, banana, tomati i kòmkòmber. Tin algun milon, pero esakinan a bini di Ulanda. E opshon pa buska fruta for di Sto.Domingo òf Colombia, tampoko ta un solushon, debí ku e frutanan no ta fresku, asina e rebendedó a splika. E sekura ku tabatin na Kòrsou den e último luna a pone ku no por a planta masha lokalmente tampoko. E asosashon di supermerkadonan sí ta mira Colombia komo un alternativa i lo reuní ku gobièrnu riba e opshon akí pa aliviá e situashon.