Parke Wifi modèrno den Oranjestraat.


Habitantenan di Oranjestraat i bisindario ta online. E sentro di bario den aire liber ta karga ku orguyo e nòmber Wifi Park Oranjestraat. For di promé instante tabata e intenshon yama e parke asina i awor danki na e proveedor Flow tin internet den e parke. Pues awor tur hende di bario por sinta i tuma nota di tur loke ta sosodé den e mundu digital. Na aña 2014 e konosido kantante, kompositor i músiko, Junior Tecla, di Fundashon Turtuga a konstruí huntu ku habitantenan un sentro di bario den aire liber. E sentro ta estilo di un “High Flying Park” di ántes, pero adaptá na e tempu moderno ku wifi. Segun Tecla e wifi ta hopi importante pa e aktividatnan ku Fundashon Turtuga ke kuminsá pa habitantenan i partikularmente pa e muchanan dje bario. “Den e mundu digital ta pasa hopi kos bon ku e muchanan no tin akseso n'e i nos ke mustra i siña nan esei. Nos ke organisá aktividat informativo, lès di internèt, pasa pelíkula i dokumental. Tambe e wifi ta bon pa turista ku ta saka portrèt. Nan por kompartí esaki mésora ku henter mundu den Wifi Park Oranjestraat mes. Ya kaba diferente artista internashonal a pasa bishitá e parke ku ta pegá ku Punda. Artistanan manera Trijntje Oosterhuis, Wyclef Jean i Anthony Hamilton ya a bishita e parke.