Merka ta kondená tèst frakasá di rakèt dor di Nort Korea.


Estadonan Uní di Merka a kondená fuertemente e tèst frakasá di rakèt balístiko di alkanse medio-largu banda di e siudat Kusong, na parti di Nort Korea. Asina pentagon a deklará djasabra. E komandante di marina merikano, Gary Ross a bisa : "Nos ta kondená esun aki i tur otro tèstnan di rakèt di Nort Korea. Nos tin intenshon di hasi nos preokupashonnan konosí serka nashonnan Uní, pa por eksigí un punto di bista internashonal. Nort Korea mester duna kuenta i rason pa e asuntunan aki,” e komandante a deklará. Pentagon a informá ku merka ta sigurá ku e lo defendé su aliadonan den e región, entre nan Sur Korea i Hapon. E tèst di rakèt no ta forma un peliger pa Merka mes, según Pentagon.